TAJASUS

KHUTBAH JUMA'AH

TAJASSUS: MILARI KAKURANGAN, NGINTIP, JEUNG NYADAP RAHASIA Batur, KALAKUAN ANU NGABAHAYAKEUN

KHUTBAH KAHIJI

إِنَّ الْحَمْدَ لِلَّهِ نَحْمَدُهُ وَنَسْتَعِيْنُهُ وَنَسْتَغْفِرُهُ، وَنَعُوذُ بِاللهِ مِنْ شُرُوْرِ أَنْفُسِنَا وَمِنْ سَيِّئَاتِ أَعْمَالِنَا، مَنْ يَهْدِ اللهُ فَلاَ مُضِلَّ لَهُ وَمَنْ يُضْلِلْ فَلاَ هَادِيَ لَهُ. أَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُوْلُهُ.

اَللَّهُمَّ صَلِّ وَسَلِّمْ عَلَى نَبِيِّنَا وَرَسُوْلِنَا مُحَمَّدٍ صَلَّى اللهُ عَلَيْهِ وَسَلَّمَ وَعَلَى آلِهِ وَأَصْحَابِهِ وَمَنْ تَبِعَهُمْ بِإِحْسَانٍ إِلَى يَوْمِ الدِّيْنِ.

أَمَّا بَعْدُ: فَيَا عِبَادَ اللهِ، اتَّقُوا اللهَ حَيْثُمَا كُنْتُمْ، وَأَتْبِعُوا السَّيِّئَةَ الْحَسَنَةَ تَمْحُهَا، وَخَالِقُوا النَّاسَ بِخُلُقٍ حَسَنٍ.

يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ.

يَا أَيُّهَا الَّذِينَ آمَنُوا اتَّقُوا اللَّهَ وَقُولُوا قَوْلًا سَدِيدًا، يُصْلِحْ لَكُمْ أَعْمَالَكُمْ وَيَغْفِرْ لَكُمْ ذُنُوبَكُمْ وَمَنْ يُطِعِ اللَّهَ وَرَسُولَهُ فَقَدْ فَازَ فَوْزًا عَظِيمًا.

Hadirin jamaah Jumaah rahimakumullah,

Alhamdulillah, urang sadaya muji sukur ka Allah SWT, anu parantos maparin sagala rupi ni'mat, utamina ni'mat iman, Islam, sareng kaséhatan, dugi ka urang tiasa ngariung dina ieu tempat pikeun ngalaksanakeun kawajiban ibadah Jumaah.

Shalawat katut salam mugia salawasna dilimpahkeun ka jungjunan urang sadaya, Nabi Muhammad SAW, ka kulawargina, para sahabatna, sareng ka urang sadaya salaku umatna anu satia nuturkeun ajaranana dugi ka ahir jaman.

Dina kasempetan khutbah Jumaah anu pinuh ku barokah ieu, khatib ngahaturkeun wasiat, utamina ka diri pribadi khatib, ogé ka sadaya jamaah, hayu urang sami-sami ningkatkeun katakwaan ka Allah SWT, ku jalan ngalaksanakeun sagala parentah-Na sareng ngajauhan sagala larangan-Na.

Allah SWT ngadawuh:

يٰٓاَيُّهَا الَّذِيْنَ اٰمَنُوا اتَّقُوا اللّٰهَ وَقُوْلُوْا قَوْلًا سَدِيْدًا

Hartina:

"He jalma-jalma anu ariman! Sing takwa ka Allah, sarta ucapkeun omongan anu bener." (QS. Al-Ahzab: 70).

Hadirin jamaah Jumaah rahimakumullah,

Dina khutbah ayeuna, khatib badé ngadugikeun hiji jejer anu penting pisan pikeun kahirupan urang sadaya, nyaéta:

"TAJASSUS: MILARI KAKURANGAN, NGINTIP, JEUNG NYADAP RAHASIA BATUR, KALAKUAN ANU NGABAHAYAKEUN."

Islam ngajarkeun ka umatna sangkan hirup sauyunan, silih pikanyaah, silih hormat, silih ajénan, sarta ngajaga duduluran, boh dina kahirupan kulawarga, masarakat, boh dina kahirupan bangsa jeung nagara.

Allah SWT ngadawuh:

إِنَّمَا الْمُؤْمِنُونَ إِخْوَةٌ فَأَصْلِحُوا بَيْنَ أَخَوَيْكُمْ ۚ وَاتَّقُوا اللَّهَ لَعَلَّكُمْ تُرْحَمُونَ

Hartina:

"Saéstuna jalma-jalma mukmin téh duduluran. Ku kituna, pék daramaikeun hubungan antara dua dulur aranjeun, sarta sing takwa ka Allah sangkan aranjeun meunang rahmat." (QS. Al-Hujurat: 10).

Nanging, dina kahirupan sapopoé, aya waé paripolah anu bisa ngaruksak karukunan, ngabalukarkeun silih curiga, silih pikangéwa, bahkan bisa nimbulkeun pacéngkadan jeung papaséaan.

Salah sahijina nyaéta kalakuan anu disebut tajassus.

Naon ari tajassus téh?

Tajassus nyaéta kalakuan maluruh, ngintip, nalungtik, atawa ngudag-ngudag rusiah jeung kakurangan batur, kalebet nyadap omongan, komunikasi, atanapi informasi pribadi batur tanpa hak sareng tanpa alesan anu dibenerkeun ku syariat.

Hadirin jamaah Jumaah rahimakumullah,

Allah SWT parantos ngalarang kalakuan tajassus kalayan écés dina Al-Qur'an, nyaéta dina surat Al-Hujurat ayat 12.

Allah SWT ngadawuh:

يَا أَيُّهَا الَّذِينَ آمَنُوا اجْتَنِبُوا كَثِيرًا مِنَ الظَّنِّ إِنَّ بَعْضَ الظَّنِّ إِثْمٌ ۖ وَلَا تَجَسَّسُوا وَلَا يَغْتَبْ بَعْضُكُمْ بَعْضًا ۚ

Hartina:

"He jalma-jalma anu ariman! Jauhan ku maranéh sabagéan gedé tina sangkaan, sabab sabagéan sangkaan téh dosa. Jeung ulah maranéh silih maluruh kakurangan batur, sarta ulah silih ngaghibah." (QS. Al-Hujurat: 12).

Hadirin anu dimulyakeun ku Allah,

Cobi urang pikirkeun, naha aya kalakuan anu leuwih matak nyeri hate tibatan aya jalma anu ngahaja maluruh kakurangan urang, ngintip rusiah urang, nalungtik kasalahan urang, tuluy ngabongkar aib anu ku Allah parantos ditutupan?

Padahal, unggal jalma tangtu miboga kakurangan jeung kasalahan. Teu aya saurang ogé manusa anu sampurna.

Allah SWT ogé ngadawuh dina QS. Al-Ahzab ayat 58:

وَالَّذِينَ يُؤْذُونَ الْمُؤْمِنِينَ وَالْمُؤْمِنَاتِ بِغَيْرِ مَا اكْتَسَبُوا فَقَدِ احْتَمَلُوا بُهْتَانًا وَإِثْمًا مُبِينًا

Hartina:

"Jeung jalma-jalma anu nganyenyeri ka kaum mukmin lalaki jeung kaum mukmin awéwé, padahal maranéhna henteu ngalakukeun kasalahan, saéstuna jalma-jalma éta geus nanggung kabohongan jeung dosa anu nyata."

Ku sabab kitu, kalakuan tajassus téh bisa ngaruksak kahormatan saurang Muslim, ngabongkar rusiahna, nganyenyeri haténa, sarta ngabalukarkeun rasa dengki, sirik, jeung mumusuhan di antara sasama.

Ku sabab éta, Rasulullah SAW ngingetkeun kalayan teges ngeunaan bahaya maluruh aib batur.

Dina hiji hadis, Rasulullah SAW ngadawuh:

يَا مَعْشَرَ مَنْ آمَنَ بِلِسَانِهِ وَلَمْ يَدْخُلِ الإِيمَانُ قَلْبَهُ لاَ تَغْتَابُوا الْمُسْلِمِينَ وَلاَ تَتَّبِعُوا عَوْرَاتِهِمْ فَإِنَّهُ مَنِ اتَّبَعَ عَوْرَاتِهِمْ يَتَّبِعِ اللَّهُ عَوْرَتَهُ وَمَنْ يَتَّبِعِ اللَّهُ عَوْرَتَهُ يَفْضَحْهُ فِى بَيْتِهِ.

Hartina:

"He jalma-jalma anu iman ngan saukur ku lisan, tapi iman can asup kana haténa! Ulah aranjeun ngaghibah ka kaum Muslimin, jeung ulah aranjeun maluruh aib maranéhna. Sabab saha waé anu resep maluruh aib batur, Allah bakal maluruh aibna. Jeung saha waé anu aibna dipaluruh ku Allah, tangtu Allah bakal ngabongkar aibna, sanajan manéhna keur aya di jero imahna." (HR. Abu Dawud jeung Ahmad).

Hadirin jamaah Jumaah rahimakumullah,

Dina hukum syariat, tajassus atawa tindakan maluruh informasi jeung rusiah batur téh kudu ditempo heula tujuan jeung kaayaanana. Aya anu diharamkeun, aya anu meunang, bahkan dina kaayaan nu tangtu bisa jadi kawajiban.

Kahiji, tajassus anu hukumna haram.

Nyaéta maluruh rusiah, ngintip, nyadap, atawa ngahaja néangan kakurangan jeung aib sasama Muslim tanpa hak jeung tanpa alesan anu dibenerkeun ku syariat.

Kitu deui, ngagunakeun téknologi pikeun nyadap telepon, maca pesen pribadi, ngarekam paguneman, atawa ngabongkar rusiah batur tanpa idin jeung tanpa dasar anu sah, kaasup kalakuan anu kudu dijauhan.

Ieu kalakuan ngalanggar kahormatan jeung hak pribadi sasama manusa.

Kadua, tajassus anu meunang, bahkan bisa jadi wajib.

Dina kaayaan nu tangtu, pihak anu boga kawenangan, saperti aparat penegak hukum jeung nagara, meunang ngalakukeun panalungtikan atawa kagiatan intelijen pikeun ngungkulan kajahatan anu nyata, ngajaga kaamanan masarakat, sarta nyalametkeun nagara tina ancaman.

Contona, nalungtik jaringan kajahatan, tindakan térorisme, makar, jeung ancaman kaamanan séjénna.

Nanging, éta ogé kudu dilaksanakeun dumasar kana hukum anu berlaku, aya kawenangan anu sah, tujuanana jelas, sarta henteu sawenang-wenang ngalanggar hak jalma séjén.

Kitu deui dina urusan pertahanan nagara, kagiatan intelijen pikeun nyaho kakuatan jeung rencana musuh bisa jadi bagian tina usaha ngajaga kaamanan jeung kadaulatan nagara.

Hadirin jamaah Jumaah rahimakumullah,

Conto kajadian anu kudu jadi pangajaran pikeun urang sadaya nyaéta nalika aya pihak anu sakuduna ngajaga kaamanan nagara, tapi malah disangka ngalakukeun tindakan ngintip, nyadap, jeung ngumpulkeun informasi sacara ilegal ka pihak séjén.

Lamun tindakan saperti kitu dilakukeun tanpa hak, henteu dumasar kana aturan, sarta ngabahayakeun kaamanan nagara, tangtu éta téh mangrupa perkara anu serius.

Urang kedah ati-ati dina narima jeung nyebarkeun béja. Ulah nepi ka urang ngahukuman hiji jalma saméméh aya bukti jeung kaputusan hukum anu jelas.

Sabab Islam ngajarkeun ka urang sangkan adil, henteu gampang nuduh, sarta henteu nyebarkeun béja anu can pasti benerna.

Hadirin jamaah Jumaah rahimakumullah,

Ku kituna, hayu urang jauhan kalakuan tajassus anu henteu dibenerkeun ku agama.

Ulah resep ngintip kahirupan batur. Ulah resep maluruh kasalahan batur. Ulah ngahaja muka rusiah batur. Ulah nyadap komunikasi batur tanpa hak.

Sing émut, urang ogé boga aib, urang ogé boga kasalahan, jeung urang ogé miharep sangkan aib urang ditutupan ku Allah SWT.

Rasulullah SAW ngadawuh:

وَمَنِ اسْتَمَعَ إِلَى حَدِيثِ قَوْمٍ وَهُمْ لَهُ كَارِهُونَ أَوْ يَفِرُّونَ مِنْهُ، صُبَّ فِي أُذُنِهِ الْآنُكُ يَوْمَ الْقِيَامَةِ

Hartina:

"Saha waé anu ngahaja ngadéngékeun paguneman hiji golongan, padahal maranéhna henteu resep pagunemanana kadéngé ku batur, atawa maranéhna ngajauhan éta jalma, mangka dina poé kiamat ceulina bakal dieusian ku cairan timah anu dilebur." (HR. Bukhari).

Ieu téh mangrupa ancaman anu kacida beuratna pikeun jalma anu resep ngupingkeun rusiah jeung paguneman batur tanpa hak.

Mugia urang sadaya dijauhkeun tina kalakuan anu kitu.

Hayu urang jaga kahormatan batur, jaga rusiah batur, sarta biasakeun ningali kahadéan batur tibatan terus néangan kakuranganana.

بَارَكَ اللهُ لِيْ وَلَكُمْ فِي الْقُرْآنِ الْعَظِيْمِ، وَنَفَعَنِيْ وَإِيَّاكُمْ بِمَا فِيْهِ مِنَ الْآيَاتِ وَالذِّكْرِ الْحَكِيْمِ، وَتَقَبَّلَ مِنِّيْ وَمِنْكُمْ تِلاَوَتَهُ إِنَّهُ هُوَ السَّمِيْعُ الْعَلِيْمُ. أَقُوْلُ قَوْلِيْ هَذَا وَأَسْتَغْفِرُ اللهَ الْعَظِيْمَ لِيْ وَلَكُمْ فَاسْتَغْفِرُوْهُ، إِنَّهُ هُوَ الْغَفُوْرُ الرَّحِيْمُ.

---

KHUTBAH KADUA

اَلْحَمْدُ لِلَّهِ الَّذِيْ كَانَ بِعِبَادِهِ خَبِيْرًا بَصِيْرًا، تَبَارَكَ الَّذِيْ جَعَلَ فِي السَّمَاءِ بُرُوْجًا وَجَعَلَ فِيْهَا سِرَاجًا وَقَمَرًا مُنِيْرًا. أَشْهَدُ أَنْ لاَ إِلَهَ إِلاَّ اللهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ الَّذِيْ بَعَثَهُ بِالْحَقِّ بَشِيْرًا وَنَذِيْرًا، وَدَاعِيًا إِلَى الْحَقِّ بِإِذْنِهِ وَسِرَاجًا مُنِيْرًا.

إِنَّ اللهَ وَمَلاَئِكَتَهُ يُصَلُّوْنَ عَلَى النَّبِيِّ، يَا أَيُّهَا الَّذِيْنَ آمَنُوْا صَلُّوْا عَلَيْهِ وَسَلِّمُوْا تَسْلِيْمًا.

اَللَّهُمَّ صَلِّ عَلَى مُحَمَّدٍ كَمَا صَلَّيْتَ عَلَى إِبْرَاهِيْمَ وَعَلَى آلِ إِبْرَاهِيْمَ. وَبَارِكْ عَلَى مُحَمَّدٍ كَمَا بَارَكْتَ عَلَى إِبْرَاهِيْمَ وَعَلَى آلِ إِبْرَاهِيْمَ فِي الْعَالَمِيْنَ، إِنَّكَ حَمِيْدٌ مَجِيْدٌ.

Hadirin jamaah Jumaah rahimakumullah,

Hayu urang sami-sami ningkatkeun katakwaan ka Allah SWT. Mugia sagala rupi ibadah sareng amal kahadéan urang ditampi ku Allah SWT.

Hayu urang sami-sami ngado'a:

اَللَّهُمَّ اغْفِرْ لِلْمُسْلِمِيْنَ وَالْمُسْلِمَاتِ وَالْمُؤْمِنِيْنَ وَالْمُؤْمِنَاتِ الْأَحْيَاءِ مِنْهُمْ وَالْأَمْوَاتِ، إِنَّكَ سَمِيْعٌ قَرِيْبٌ مُجِيْبُ الدَّعْوَاتِ.

اَللَّهُمَّ إِنَّا نَسْأَلُكَ الْهُدَى وَالتُّقَى وَالْعَفَافَ وَالْغِنَى.

اَللَّهُمَّ إِنَّا نَسْأَلُكَ الثَّبَاتَ فِي الْأُمُوْرِ، وَنَسْأَلُكَ عَزِيْمَةَ الرُّشْدِ، وَنَسْأَلُكَ شُكْرَ نِعْمَتِكَ يَا أَرْحَمَ الرَّاحِمِيْنَ.

اَللَّهُمَّ أَحْسِنْ عَاقِبَتَنَا فِي الْأُمُوْرِ كُلِّهَا وَأَجِرْنَا مِنْ خِزْيِ الدُّنْيَا وَعَذَابِ الْآخِرَةِ.

Hadirin jamaah Jumaah rahimakumullah,

Ya Allah, mugia Gusti maparin pituduh ka urang sadaya kana jalan anu leres.

Ya Allah, bersihkeun hate urang tina sipat dengki, sirik, sombong, jeung resep kana kakurangan batur.

Ya Allah, jauhkeun urang tina kalakuan anu resep maluruh aib, ngintip rusiah, jeung nyadap informasi batur tanpa hak.

Ya Allah, tutupan sagala aib sareng kakurangan urang. Mugia Gusti maparin kamampuh ka urang pikeun ngajaga lisan, ngajaga paningal, ngajaga hate, sarta ngajaga kahormatan sasama.

Ya Allah, jadikeun nagara urang nagara anu aman, tengtrem, adil, raharja, sarta dijauhkeun tina sagala rupa kajahatan jeung pacéngkadan.

Ya Allah, pasihan kaséhatan ka anu keur gering, pasihan kalancaran rezeki ka anu keur usaha, pasihan katengtreman ka kulawarga urang, sarta pasihan kasalametan ka urang sadaya di dunya sareng di ahérat.

رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ.

رَبَّنَا تَقَبَّلْ مِنَّا إِنَّكَ أَنْتَ السَّمِيْعُ الْعَلِيْمُ. وَتُبْ عَلَيْنَا إِنَّكَ أَنْتَ التَّوَّابُ الرَّحِيْمُ.

عِبَادَ اللهِ، إِنَّ اللهَ يَأْمُرُ بِالْعَدْلِ وَالْإِحْسَانِ وَإِيْتَاءِ ذِي الْقُرْبَى وَيَنْهَى عَنِ الْفَحْشَاءِ وَالْمُنْكَرِ وَالْبَغْيِ، يَعِظُكُمْ لَعَلَّكُمْ تَذَكَّرُوْنَ.

فَاذْكُرُوا اللهَ الْعَظِيْمَ يَذْكُرْكُمْ، وَاسْأَلُوْهُ مِنْ فَضْلِهِ يُعْطِكُمْ، وَلَذِكْرُ اللهِ أَكْبَرُ.

آمِيْنَ يَا رَبَّ الْعَالَمِيْنَ.

Mugia naskah ieu tiasa janten pangéling-ngéling pikeun urang sadaya.